منذ منتصف تشرين الثاني/ نوفمبر، بدأت ربى بتدوين يومياتها خلال الحرب عبر إرسال مسجات واتساب صوتية إلى عدد من أصدقائها القلقين عليها. قرر أصدقاء ربى طباعة رسائلها ونشرها عبر صفحة مدونة آملين أن يقرأها جمهور أوسع، ولتحقيق غايتهم تواصلوا هم وربى معنا ليطلبوا من إنسانيات أن تنشر مقتطفات من يومياتها بإضافتها إلى أصوات من غزة مع رابط مدونتها. اعتباراً من 21 كانون الأول/ ديسمبر، تواصل ربى تدوين يومياتها على موقعها itsrubaingaza.blogspot.com.

الثلاثاء، ٢١ تشرين الثاني/نوفمبر 2023

... من بداية الحرب، صرنا سامعين أنواع مختلفة من القنابل والانفجارات مرة ومرتين ٣ و٤ و٥ و٦ و١٠ و١١، و١٠٠ مرة باليوم. في بعض الأيام بنسمع بس نوع أو نوعين من الانفجارات. بس هدول بكون إلهم مفعول أقوى بكثير من الأنواع الثانية اللي بنسمعها في أغلب الأحيان. 

على الرغم من ذلك، الناس ما زالت مستمرة بحياتها اليومية في غزة. بيصحوا على صوت الانفجارات، بس كمان بيصحوا وببالهم الأفكار اللي بتراود أي شخص طبيعي – أفكار مثل: "كيف رح ندبر حليب للأطفال؟ كيف رح نطبخ للأولاد؟ كيف رح نضمن أنه نوفر لهم وجبة باليوم على الأقل؟" إذا نجحوا أنه يوفروا الحاجات الأساسية، بيشعروا بالراحة. 

هذا اللي رح أحكي عنه برسالتي اليوم. 

واحدة من الحاجات الأساسية اللي انا بدي إياها بس مش قادرة ألاقيها بالسوق هي الباور بانك [power bank] حتى أقدر أشحن تليفوني قدر الإمكان. والقهوة كمان. ممكن تضحكوا، بس هون القهوة مش رفاهية، هي حاجة أساسية، وغير متوفرة بالسوق. السلع الأساسية مثل الزيت للطبخ، والبقوليات، والمعلبات بالعادة متوفرة. بس الإشكالية الأكبر هي انه فش خبز. مثل ما قلتلكم سابقاً، عشان نجيب خبز، كثير ناس بتروح توقف بالدور على المخبز من الساعة ٤:٣٠ الفجر، وبحاولوا يجيبوا ١٠ أرغفة كل مرة لأنه عيلهم كبيرة. اليوم بس مسموح ٥ أرغفة للعائلة الواحدة، وهذا غير كافي. 

وكمان اليوم كثير صعب علي أني أوفر أكل لبسسي [قططي] لأنه أصلاً ما في أكل كفاية للبشر في السوق، فكيف رح يقدر الشخص يوفر أكل حيوانات- هاي كمان مهمة صعبة. 

اليوم ركبت في تاكسي مع كمان شخصين- السائق وكمان شخص جالس بحدي. ريحة البنزين كثير سيئة لأنه الناس بتستخدم زيت قلي للسيارات. احنا فعلاً عايشين بمكان موبوء- اليوم كان أول مرة بحس حالي مخنوقة بالسوق. وما كان السبب أنه في كثير ناس. السبب كان ريحة الحريق. زيت القلي يستخدم كمان لمولدات الكهربا في المستشفيات.

الساحة بجانب المبنى اللي قاعدين فيه

من بداية الهدنة كان عنا غاز وبنزين للسيارة والطبخ. العائلة اللي مستضيفتنا ظلوا واقفين في طوابير طويلة ليومين عشان يجيبوا غاز للبيت. مش معقول. وعم بحاولوا يلاقوا طرق بديلة لأنه كثير متعب. مرات واحد بروح بوقف بالطابور خلال النهار، وحدا ثاني بروح بياخذ مكانه دوام (شفت) الليل. أو أنه حدا بيعرفهم بساعدهم، بس هم كمان بصير لازم يساعدوا غيرهم يدبروا غاز.

كنت متأملة أنه أعبي سيارتي بنزين عشان أكون جاهزة في حال قدرنا نرجع على مدينة غزة. مثل ما خبرتك، سيارتي انقصفت في أول الحرب، بس لسا بقدر أسوقها. وبرضه محتاجة بنزين إذا اضطريت أنزح لمصر. احنا عنجد مش حابين نروح، بس إذا انجبرنا ننزح، لازم نكون جاهزين. الناس عم تقضي كل يومها في الهدنة واقفة بطوابير البنزين والغاز بدل ما يعملوا إشي مفيد لإلهم أو للي حواليهم. وهلأ عرفت أنه الهدنة تمددت كمان يومين، بس لسا بنقدرش نرجع ع بيتنا.

الأربعاء، ٢٩ تشرين الثاني/نوفمبر 2023

امبارح وصلني خبر أنه صديقتي وزوجها استشهدوا. هي طبيبة وزوجها بشتغل بالاستشارات ومعروف في غزة. تعرفت عليها لأنها أم واحد من الشباب الصغار اللي كنت أشتغل معهم زمان وكان يدرس بكلية البيطرة في غزة. وكمان، أخيراً وصلني أخبار عن بيتي. بما أنه في هدنة، في حدا قدر يروح ويشوف شو صار بالبيت.

احنا كنا عايشين في الطابق الثالث. الطابق الثاني والطابق السادس من عمارتنا انقصفوا. بما أني عايشة بالعمارة، فبعرف أنه في الطابق الثاني كانت عايشة عيلة بعرفها من زمان كثير، وبقدر أقول بكل تأكيد أنه ما إلهم أي علاقة بحماس. أصلاً، هم عيلة مسيحية ومسالمة وهادية. كلهم مدنيين. فوق هيك، الطابق السادس اللي انقصف، أنا متأكدة أنه فاضي وما في حدا عايش فيه. الشخص اللي كان عايش هناك، كمان ما إله علاقة بحماس. بس بكل الأحوال هو مات زمان. كان أخو ياسر عرفات، فتحي عرفات. وكل ورثته مش عايشين في غزة. عايشين في رام الله. فالشقة فاضية ومسكرة. بقدر أقول هالحكي بكل ثقة، لأني أنا عايشة بالعمارة، ولأنه في حارس. أنا بشوف مين بدخل وبطلع من العمارة، وما في حدا بروح على هذاك الطابق.

عمارتنا تدمرت جزئياً في حرب ٢٠٢٠، وهلأ تضررت كمان مرة من قنبلتين. قبل هيك، لما كانت متضررة، كانت تُصنَّف أنها غير صالحة للسكن. أخذنا وقتها ٣ سنوات عشان نعرف نرجع نعيش فيها... لأنه في عيلة استضافتنا في رفح، بتمنى أني أنا أستضيف عائلتين في بيتي بس نرجع. بدي أرد جميل ولطف العائلة اللي استضافتنا من خلال استضافة عائلات تانية محتاجة بيت.

كمان قدرت أتأكد أنه صديقتي اللي خسرت ٣ من أولادها لساتها عايشة هي وزوجها. مش عارفة كيف راح تقدر تعيش بعد ما خسرت ولادها الثلاثة مرة واحدة. خصوصاً بعد ما انتظرتهم سبع سنين ليوصلوا.. كيف راح يقدروا كل هدول الناس اللي خسروا عيلة وأقارب أنه يكملوا بحياتهم؟

ومع ذلك، الحياة لازم تستمر. واحدة من الشغلات اللي انتبهت لها أنه بعد أسبوع الهدنة هاد، الكل بس بده يكمل حياته بسلام. الكل حوالي بقول أنه نسينا القصف تماماً، وكأن شيئاً لم يكن... ما بدي أرجع أسمع أصوات القصف والغارات كمان مرة بحياتي. خلينا نشوف إذا رح نسمع أخبار عن تمديد الهدنة.

السبت، ٢ كانون الأول/ديسمبر 2023

اليوم الصبح صحيت على صوت القصف الساعة ٦:٥٥. كنا عارفين من الليلة الماضية أنه هيك رح يصير، لأنه الطيران الإسرائيلي ما وقفش فوق رفح. وخلال النهار كان في كمان انفجار كبير في البلد. وكان في كمان غارة قريبة من المكان اللي احنا قاعدين اليوم فيه مع آخرين. عم نسمع صوت القصف طول الوقت. كثير غريب أنه صرنا نحس هاي الأصوات وكأنها أصوات مكررة، [كأننا سامعينها من قبل]. بس مفعول هالأصوات مش مكرر، [دايماً جديد،] مفعولها كبير.

الأحد، ٣ كانون الأول/ديسمبر 2023

الليلة الماضية كانت صعبة كثير لأنه الدرون ما وقف فوق روسنا. ولا عرفت أنام، وصحيت راسي بوجعني. امبارح صحيت على خبر أنه ما راح يدخلوا أي مساعدات إنسانية لغزة. بعدين صاروا يقولوا أنه المساعدات راح تقل مقارنة بما كانت عليه أيام الهدنة. راح يكون هذا أثره كبير على الناس هون.

مصطلح مساعدات إنسانية بيلعب على عصبي... لما نقول مساعدات إنسانية ببين وكأنه احنا ناس محتاجة...

أخذت صورة لأولاد عم وإخوة البيبي [الطفل] الجديد اللي معنا بالبيت. كلهم قاعدين بيتفرجوا على البيبي النايم. أخذت هالصورة لأنه ولادة طفل بتعني حياة جديدة وبتعطي أمل أنه رح يكون إلنا مستقبل. وكمان لما نشوف طفل صغير، بصير الواحد يفكر أنه "كيف راح يعيش؟ راح يعيش لفترة طويلة؟ شو البيئة اللي راح يعيش ويكبر فيها؟" كل هاي الأفكار بتتراود للشخص لما بيتفرج على طفل. اسمه محمود وعم بنادوا عليه محمود القدس لأنه ولد في القدس لما أمه كانت رايحة تتعالج.

الثلاثاء، ٢١ كانون الأول/ديسمبر

... شعور مأساوي خلال اليومين الماضيين واحنا نحاول نلاقي خالتي وعمتي. لسا مش قادرين نلاقيهم. ما بنعرف وينهم، وما بنعرف شو بيعملوا. ولا اشي بيخلي القلب يدمّع مثل شوفة الأطفال بيبكوا بدهم حليب أو أكل، وأنا عارفة أنه ما راح نقدر نوفر لهم لأنه الناس ما معها مصاري، والأكل مش متوفر بالسوق أساساً.

امبارح سمعت أخبار مرعبة عن أقاربنا. يمكن هاي أول قصة عنجد مرعبة راح أرويلكم إياها في هالمذكرات. واحد من أقربائنا البعاد شوي (نسيب ابن عمي)، كان مع عائلته في البيت لما الجنود الإسرائيليين دخلوا المبنى. فصلوا النساء لجهة والرجال لجهة، وأخذوا الرجال للشارع. الجنود كانوا بيغنوا بصوت عالي وبيرقصوا وسألوا قرايبنا وكل الرجال أنه يشلحوا كل ملابسهم. وأجبروا كل النساء والأطفال بالبيت أنه يتفرجوا عليهم. وبعدين طخوا وقتلوا الرجال على الأرض. ماتوا مشلحين في البرد. وبعدين طخوا كم امرأة وطفل. كان في طفل رضيع. وظلوا ينادوا ويطلبوا المساعدة من الكل. ما بنعرف شو صار فيهم هلأ. مش عارفين نوصل لهم. عرفت عن الموضوع بالأول من الأخبار، بس ما ربطت أنه هذول قرايبنا. وبعدين قريبنا في مصر شارك الخبر معنا على جروب واتساب.

القصص اللي عم نسمعها بشكل يومي مرعبة. سمعنا عن حدا اللي أجبروه يدخل على بيت مدمّر عشان يفحص إذا في حدا لسا عايش جوا ولا لأ. لما طلع من البيت كان لونه أصفر من الصدمة. وصف كيف أنه شاف امرأة واقفة في نص الركام، عينيها مبحلقات بتتفرج عليه وماسكة سكينة. طبعاً، ما حدا صدقه، وصاروا بدهم يشوفوا بعينيهم. لما دخلوا، لاقوا أنه عنجد في امرأة انقتلت وهي ماسكة سكينة. ايدها اللي فيها سكينة كانت بزاوية قائمة. وفي ايدها الثانية كان في حبة بطاطا. يعني هي كانت راح تبلش تطبخ أكل. ماتت وظلت واقفة بعد الانفجار، لأنه جسمها كان راكي على حجر.

كثير مرعب أنه نسمع قصص الناس اللي في غزة، بما فيهم قرايبي اللي صارلهم أيام بدون أكل. ما بنعرف شو عم بصير معهم. اللي بنعرفه على الأكيد أنه لما واحدة من العائلات تفقد الأمل تلاقي اشي تشربه أو تاكله، بياخذوا توالي المي في قاع الغسالة، اللي هي بالعادة مقرفة ومش صحية وعلى الأغلب صارلها أيام وأشهر، وشربوا هاي المي. هاي كانت الطريقة الوحيدة ليظلوا على قيد الحياة. 

ربى، ولدت في مدينة غزة، عاشت فيها معظم حياتها. لأكثر من عشرين عاماً، عملت ربى مع منظمات إنسانية دولية تُعنى بحقوق الطفل وقضايا النوع الاجتماعي في غزة ومنطقة الشرق الأوسط وشمال أفريقيا. عملت في غزة مع المجتمعات المحلية لتدعيم نظم الحماية الاجتماعية للأطفال وعائلاتهم. تولي ربى أيضاً اهتماماً خاصاً لرعاية الحيوانات ورفاهيتها، وتنشط في مبادرات رعاية الحيوانات في غزة.