١٨ تشرين الأول/ أكتوبر

نمنا سنة ٢٠٢٣ وصحينا في ١٩٤٨

١٩تشرين الأول/ أكتوبر

كأنه

رعب

 ٢٠ تشرين الأول/ أكتوبر

٠"نعيماً" ... اليوم تحممت

وصلحت جزئيا شاشات الطاقة 😃٠

هذا طبعا ما بكفي لكل الحارة

على الأقل بكفي ليحصل الجميع على ميه للشرب

٢١ تشرين الأول/ أكتوبر

الوضع اليوم زي الخرا

القصف ما وقف

دخلولنا أكفان اليوم [من المعبر من مصر]

هذا عن جد ومش مجازا

شاحنتين من أول عشرين شاحنة مساعدات كانت حاملة أكفان

ما في حاجه للأكفان لأنه الشهيد ما بتكفن وعند المسيحيين بلبس اواعي

وبعدين مش هاي أهم حاجة مطلوبة

اليوم في مقابر جماعية

التفاصيل مش كثير مهمة

المهم انو احنا نفكر أحياناً

المساعدات ما بتدخل، وأظن اللي وصل كان للجنوب، مع انه الاحتياج الأكثر للمساعدات في الشمال وغزة [المدينة]

ما فيش خبز، فيش ميه، فيش حفاضات للكبار ولا للصغار، ولا فيه حليب ولا بلاستيك لتغظية الشبابيك [بدل الزجاج المكسور] هذا اذا البيت مش مهدوم كليا. وفيش حرامات، ولا فرشات، ولا كهربا، ولا ملابس داخلية أو خارجية، ما فيش أولويز [فوط نسائية] وما فيش معلبات للأكل

تخيلي حالك صحيت بالصحرا، ولازم تعيشي على ولا شي

الحلو انه الناس عاملين شبكة حماية

بس الحرب اجت، والناس أصلا فقيرة – الطرفين: الضيف والمعزب [صاحب البيت]

ما فيش أدوية بجميع أنواعها من بنج، أو وسائل تنظيم الأسرة أو أي شي ممكن تتخيليه

قهوة غامقة بدون حب هال

ألوان للرسم والعاب أطفال

خلص

الأسعار ما تغيرت ولا زادت

والبنزين والسولار

من إمبارح والعمليات الجراحية تتم بدون بنج

الجروح اللي بسبب الشظايا بعملوا العمليات إذا كانت الشظية في مكان مش خطير كثير

وأولوية العلاج تعطى للشخص اللي عنده أمل وفرصة أكبر أنه يظل عايش

٢١ تشرين الأول/ أكتوبر

✌️✌️✌️

بتتذكري اياد اللي بعمل لوحات الأرابيسك عندنا في المركز؟

هو في حالة خطيرة

واثنين من المتطوعين في المركز توفوا

بجد ... أنا تعبانة

رُكبي مش حامليني

صداع

ألم في الظهر

ما في تركيز

لكن ما عندي إكتئاب

أنا حزينة

وهذا كل شي

لا تقلقي

٢١ تشرين الأول/ أكتوبر (مساء)

أنا شخصياً بدي فنجان قهوة من النوع المنيح، وبدي أنام لي ساعتين متواصلات بدون ما أصحى مفزوعة

أنا بطلت أعرف أحكي جمل طويلة

بنسى بشكل خرافي

اليوم طلعت من الشغل

حسيت حالي ضايعة

والله هذا مش بسبب السن

بعد يوم السبت، صرت أنسى أكثر من لما كان آخر عيد ميلاد إلي

والله

….

أنا بقول ممكن انها فكرة جيدة انك تيجي

أنا حولي ناس كثير ماتوا، أصحاب وزملا ومعارف

يمكن ما يبقى منا حدا

الدائرة صارت كثير صغيرة

خلال الأسبوع الماضي حاسة انه الأولاد كبروا كثير

....

تخيلي إذا بقدر آجي لعندك بالسيارة واجيب العيلة عالنيل ههههه

....

[رسالة تمت إعادة ارسالها]

٠"#تنويه ...ابتداء من غدا الأحد، سيتم بيع ربطة الخبز وزن ٣ كيلو بسعر ٤ شيكل يتم دفعها لصاحب المخبز وذلك بعد الاتفاق بين وكالة الغوث وأصحاب المخابز بعد تزويدهم بالدقيق.٠

 ستبدأ المخابز بالبيع بموجب هذا الاتفاق ابتداء من فجر غد الأحد ٢٢\١٠\٢٠٢٣

[والـ ١٨ مخبز الموجودة في الجنوب مذكورة]

أولاً : منطقة رفح

١. مخبز الحاج حسن

٢. مخبز العمدة

٣. مخبز زاد الخير

٤. مخبز محمود المعشر

٥. مخبز كندا

٦. مخبز اللؤلؤة

٧. مخبز عبد العزيز تمراز

ثانياً: منطقة خان يونس

١. مخبز يازجي عابد

٢. مخبز الحلو

٣. مخبز دياب

٤. مخبز السلام

٥. مخبز الجردلي

٦. مخبز النور

٧. مخبز القدس

ثالثاً: الوسطى

١. مخبز الياسين

٢. مخبز النصيرات الآلي

والمخابز هي ...٠

شكرا، مصر.٠

٢٢ تشرين الأول/ أكتوبر

زميلي اللي زي أخويا استشهد

هو فنان، كسر قلبي

قتلوا ناس نازحين على راس الشارع

راسي راح ينفجر

٢٣ تشرين الأول/ أكتوبر

بدي أنام

أنا تعبانه

انا رح اموت

حكوا انه راح يخلص [القصف] في منتصف الليل

٢٤ تشرين الأول/ أكتوبر (صباحاً)

رعب!٠

٠

٢٤تشرين الأول/ أكتوبر (مساء)

ما أظن إني رح أعرف أنام

عندي شغل لازم اعمله

زميلي اللي بشتغل معي في الطوارئ، بناته مدفونات تحت الردم

وأبوه استشهد، ومرته [زوجته] استشهدت كمان

والقصف شغال

وحالياً في قصف بجوار الملجأ اللي جنب الشغل، غالبية الموجودين أطفال، مليان أطفال

بعد ٤٥ دقيقة

هناك ١٣ شهيد في الشلتر [الملجأ]

٢٦ تشرين الأول/ أكتوبر

معلش الأيام بتزيد صعوبة، والفقدان والحزن بزيد كل يوم

لكن اليوم زميلي أحمد طلع بنته من تحت الردم بعد ٣٦ ساعة

اسمها أفنان وعمرها حوالي ٩ سنوات

الليالي مرعبة والنهارات مرعبة

أفنان الصغيرة بخير

ورجعتها للحياة ردت الروح لأبوها

وردت الحياة والأمل للكل

بتحكي قصص عن الـ ٣٦ ساعة [التي قضتها تحت الردم]

امبارح كنا مكتئبين في الملجأ، ولما اجانا خبر انه تم انتشال أفنان الصغيرة حية، عملنا حفلة. لكن فجأة وصل خبر إنه ديما، صبية عروس وحامل في الشهر الأول تحت الأنقاض.٠

ورجع الحزن، وزاد هذا الحزن لما قالوا انها استشهدت هي والجنين وزوجها وبقية العيلة

هذا كان صعب كثير

أنا روحت، عشان أنا بعرف ديما، هي من عيلتنا وهي صاحبة بنت أختي رنا

أنا ما عدت استحمل

زاد عدد الناس اللي بستشهدوا من الحرب وبنعرفهم من قريب أو من بعيد. بعضهم استشهد من القصف، أو مدفونين تحت الردم، أو لأي سبب ثاني من تفاصيل الحرب

أنا تعبت شوية

بس اليوم صرت أحسن

أنا مشغولة لأنه لازم أفتح ملجأ ثاني

أول مهمة هي مسألة توفير الماء

أنت سألت وأنا بجاوب

...

أنا بتمنى لو بقدر امشي على النيل

لو ممكن ...٠

٠

٢٦ تشرين الأول/أكتوبر (مساء)

عزمت ابن اخوي وليد على الفطور، فطور منيح

جبت البيض من جاجاتنا اللي بطلوا يبيضوا لأيام لأنهم كانوا خايفين

وليد شاب كويس

استشهد صديقه وابن صفه

لكن أموره لا بأس بها

✌️

اسمعي، اذا بتيجي تشتغلي عندنا، ممكن أروح أنام

هذا لازم يكون جزء من المساعدات الإنسانية

انهم يبعثوا ناس تشتغل في المستشفيات

وفي الملاجئ

ينظفوا الشوارع

أنا بحكي عن جد

....

لأنه التركيز عندنا راح، في السالب

وأنت بتعرفي التفاصيل، الأشياء من سيء لأسوأ

بتصلحي شغلة، واشي ثاني بنكسر أو بروح بالطريق الغلط

منيح اننا بعدنا عايشين

اليوم مثلا لوحات الطاقة الشمسية اللي انضربت في الهجمة السابقة، بالإضافة الى مضخة المياه للبيت والملجأ الجديد كلها انضربت

٢٦ تشرين الأول/ أكتوبر

اسمعي، نسيت أخبرك انه اليوم اكلنا كشري، لأنه في عندنا ناس مصرية

وكمان أكلنا رز عراقي، صراحة إشي كثير زاكي [طيب]

في وحدة عراقية-مصرية متزوجة غزاوي، هي زي العسل، وبتعملي نسكافيه بدون حليب

بدنا دعواتكم، الليلة شكلها راح تكون عدم [صعبة]

٣٠ تشرين الأول/ أكتوبر (ساعات المساء المتأخرة)

مرهقة

بس هيك

في قصف كتير وكل يوم بنفقد ناس كتير

بحاول أحافظ على معاني الأشياء

معاني الناس والأشياء والأوقات وهيك ...٠

شكله بطل في إشي إله معنى

بس إذا الحياة صارت بدون معنى بنصير مثل الجماد صح؟

أنا بدي أحافظ على نفسي كإنسان أو كحيوان

أي اشي بحمل داخله معنى أو معاني

بديش إني أوصل مرحلة انها بطلت تفرق معي

فاهمه كيف؟

بس هيك

مع كل التفاصيل واللوجستيات عن كل شيء، تفاصيل وتفاصيل ولوجستيات ...٠

بعد ٥ دقائق

اسألي م. إذا بتتذكر لما كنا على الشط مع ي. وقلت لهن خلال ٥ سنوات راح نتحرر

وقتها فكرت اني انجنيت

قلت لها

لما بصيروا لا أخلاقيين، (والعالم) بشوف انهم لا أخلاقيين

راح يخسروا ... أنا عندي أمل

على أية حال بحاول ...٠

٣١ تشرين الأول/ أكتوبر (في الصباح الباكر)

صباح الفل

أنا من الساعة خمسة وأنا في السوق

جبت خيار وبصل أخضر هههه

عنا حفلة عدس اليوم

 تفضلي

عدس مع خبز طازه

[ترسل صورة لطنجرة كبيرة من العدس مع خبز طازج]

١تشرين الثاني/ نوفمبر (مساء)

والله انا تعبانة

مثل الزومبي

نقلنا المطبخ للجنينة

عشان الغاز مش متوفر

لازم نوفر كميات كبيرة من الطعام لأعداد كبيرة من الناس

٠"أفواه وأرانب" [تشير إلى فيلم مصري مشهور] يعني هيك شي

لكن بدون الأرانب في حالتنا

وحياتك ... صرنا نطبخ وجبات نباتية على الحطب

يا دوب في غاز يكفي لحليب الاطفال ...٠

على فكره، لقيت كيلو قهوة مطحونة مثل ما بحبها، واليوم عملت فنجان قهوة على مزاجي.٠

تخيلي اليوم نزلت عشان أشتري جبنة وبيض وزعتر وهيك أشياء. رجعت على البيت ب ٤ باكيتات أندومي [شوربة معكرونة سريعة]

...

هاي أول مره بشوف الأندومي والأطفال مكيفين عليها

لو بدي أشرح لك تفاصيل ربع ساعة من حياتي راح تنخنقي

...

أنت عمرك جربتي الأندومي؟

الصغار بحبوه كثير

منيح للصغار

كأنه فيه كوكايين

.....

تمام، راح أجربه

بكره بدي اجيب كمان أندومي بسبب ردة فعل الأطفال والسعادة الي ملت البيت [بعد تناولهم للأندومي] بدي أحافظ عليها [سعادة الأطفال] ...٠

يعني بدك تبعثي لنا أندومي؟

ههههههه

خليها على ذوقك

…………….

لا ما في نوم

٠[المشكلة مع النوم] مش بس بسبب أصوات القصف

أنا بنام في الصالون بالدور الثاني لا شبابيك ولا أبواب

في أصوات من كل الجهات، وفي كمان أصوات القنابل الضوئية

يعني النوم المتواصل ما بيزبط

وكمان الدنيا برد شويه

إذا بتطلعي من الشباك كأنك بتشوفي بث حي من تلفزيون الجزيرة. شاشة مساحتها ١٠٠ إنش/بوصة

 في عندنا بطانيات، لكن في أشخاص كثير بحاجتهم

.....

يا حبيتي إحنا مش بحاجة نسمع أو نشوف الأخبار

إنت نسيت انه إحنا صرنا الأخبار؟

شباكي شاشة بث حي ومباشر

إسمعي، الانترنت والجوال صاروا بالدور

يعني زي الكهربا والميه

كل منطقه بتوصلها هاي الخدمات كم ساعة [في اليوم]

عندنا "الكهربا" بتيجي الساعه ١٢، وبعد شويه راح تروح

قالوا انه الخط المصري راح يجي

بس ما راح يوصل عندنا هون ...

لما يجي النت كل واحد بيبعت رسالة للزملاء في الشغل

بس عمالنا بنفقد ناس كتير

بطلنا نسأل عن الإصابات والبيوت اللي راحت

بس بنسال عن الحياة

بدي أعطيكي كم مثال:٠

مأساة شهداء إبنة عمته لمحمد  كانوا تحت أنقاض بيتهم.٠

لما طلعوهم من تحت ردم البيت، طلعوا بس ٩ أشخاص من ٢٧

من مجموعة الشغل

زوج الست م.ج، أم أسامة

هذا بس مثال واحد اليوم ومن جروب واحد

وهاي مثال ثاني: [تعيد ارسال رسالة استلمتها]

يعطيكوا العافية يا جماعة

ان شاء الله تكونوا كلكم بخير

سؤال، من وين ممكن أسحب راتبي في رفح؟

ممكن يكون في صراف آلي شغال، بس ما فيه أي شي تشتريه

وهدول المساكين الموظفين عليهم ديون لازم يسدوها

وهاي كمان رسالة، شوفي:٠

حسبنا الله ونعم الوكيل. هو الوحيد اللي بإمكانه يحمينا

عظّم الله أجركم يا أم العبد أنت و د. فيروز ولمياء

اللهم  يتقبلهم مع الشهداء، وانا لله وانا اليه راجعون

من الزملاء الثلاث في الشغل كل واحد عنده مجموعة شهدا في يوم واحد

وضع غريب

على أية حال

نفسي أمشي على النيل، والله نفسي

.....

أنا آخر مره دخلت وسط البلد [في القاهرة] كان سنة ٢٠١١

وقتها كانوا رصفوا ضفاف النيل بالإسمنت

بس أنا متأكدة انه لا زالت هناك مناطق النيل فيها بدون مشاكل

احجزيلي مطرح نظيف [على ضفة النيل]

ههههه

...

تصبحي على خير ويا رب أعرف انام

يا رب

تحديثات من س. منذ بداية شهر تشرين الثاني/ نوفمبر 2023

س. أخصائية اجتماعية، كما ورد في سيرتها الذاتية الموجزة، كانت عضوة مؤسسة ومديرة لمراكز محلية تهتم بالأطفال والشباب في خان يونس. واستناداً لتجاربها في الحروب الإسرائيلية السابقة على غزة، بادرت س. سريعاً بالتعاون مع عاملين/ات ومتطوعين/ات آخرين لتنظيم جهود إغاثية تشمل مطابخ لتوزيع الوجبات للمحتاجين، وتوفير أماكن إيواء لبعض النازحين الذين تجاوز عددهم مليون ونصف غزي اضطروا للنزوح إلى الجنوب. بالرغم من أن منطقتها لم تسلم من القصف، تمكنت س. حتى أوائل شهر كانون الأول-ديسمبر من البقاء في منزلها مع عائلتها، ولكنهم، مع بدء الغزو البري الإسرائيلي لخان يونس، اضطروا للبحث عن مأوى في مكان "أكثر أمناً" لدى أقاربهم في المنطقة – ليُجبروا مرة أخرى على النزوح قسراً باتجاه الشرق. وأخيراً، في نهاية شهر كانون الأول، كان عليهم الفرار من منطقة خان يونس ليحاولوا مع غالبية سكان غزة العثور على مأوى في رفح. وفي كل جولة من جولات نزوحهم، كان على س. ومن تبقى من مجموعة زملائها والمتطوعين/ات العمل سوياً على إعادة بناء أماكن الإيواء المدمرة وإنشاء المطابخ لتقديم الإغاثة لمئات العائلات النازحة حولهم. 

11 تشرين الثاني/ نوفمبر (صباحاً) 

آسفة

مرضت شوي

جسمي مش قادر يحمل روحي

الناس برا عارفة شو بيصير بغزة؟

23 تشرين الثاني/نوفمبر 2023

مشكلة اليوم، من بين المشاكل اليومية في الشيلتر (المأوى)، كانت بسبب قطونيل 

غسل الشباب البوكسرات ونشروهم ليجفوا 

والمشكلة صارت لمين القطونيل ولمين البوكسرات من الماركات الثانية

كان في اقتراح إنه نفتشهم، بس أنا ما رضيت

24 تشرين الثاني/ نوفمبر 2023 (ليلاً) [مع بداية وقف إطلاق النار المؤقت الذي استمر لأسبوع واحد فقط]

سلميلي عليهم كلهم

قوليلهم إني رحت على البحر

بس والله مشغولة جداً، جداً بشكل غريب

راح أفقد عقلي بين المأوى اللي بالدار ومركزي الإيواء اللي بالشغل

الشغل 7/24 تحت القصف مش سهل

سلميلي عليهم كلهم

كان البحر كثير حلو

فش فيه ريحة حرب، فكان ممتاز

لكن والله اليوم حزين كثير 

اليوم سمعت إنه ناس كثير بعرفهم ماتوا

وسمعت عن ناس ماتوا من أسابيع، ودفنوهم بس اليوم

وفي ناس فقدت الاتصال فيهم تماماً

الحرب كثير وقحة 

السبت 30 كانون الأول/ ديسمبر 2023 (ظهراً) 

ميلاد مجيد Merry Christmas

الحياة صعبة جداً

بس احنا صامدين

قربت تخلص

تعالوا زورونا

على الأقل، هيك لازم نفكر عشان يخلص النهار

إنه قربت تخلص

يالله، تعالي

...

قبل ما تفكري تجيبلي سمك رنجة مدخن

بدي دواء للسكري

بدي مسكن عام للجسم

بدي منوم

وبعدين رنجة 

...

كان السكري عندي مسيطر عليه

لكن اليوم لا

...

بحتاج لحبوب، ما بحتاج أنسولين 

فورسيجا والميتفورمين Forxiga Metformin 

محتاجة أنام بجد

وبدي أدخن

بيتنا انقصف أكثر من مرة 

كنت راح أموت 3 مرات، لكني ما متت

والبيت بعده واقف مكانه

راح نصلحه

وأكيد راح نرجعه أحسن مما كان

لكن ذكريات الأشياء

مش مهم – راح نبني ذكريات أحسن كمان

...

والله انها أيام صعبة 

وتفاصيل صعبة

حزن، وفقدان، وألم، بس والله صامدين 

معلش ما عندي لا كهرباء ولا شيء

عايشين بزمن الهكسوس

لسه ما وصلتنا الحضارة 

حتى أقدر أشبك نت (انترنت) مشيت بالسيارة ساعة ونصف

ولا شيء من التاريخ [وصلنا]

السيارات ماشية على السيرج، زيت القلي

والريحة بتقتل

...

والله

...

رائحة الشوارع زي العمى (مقرفة)

لما رجعت، قعدت أستفرغ نصف ساعة 

وهذا مش حالي أنا بس

...

بدي بس أمشي على النيل

وأشرب قد ما بدي ميه (ماء)

وأكب ميه على الأرض عادي بدون ما أقلق

...

ديري بالك على الميه (الماء)

هههههه

...

نسيت حتى كيف بنستعمل الدوش (الشاور)

ابن أخوي بحكيلي كنا نتصل بالسنترال ليوصللنا الميه

هههههه

...

[أحلامي بالمستقبل]

مسبح، وحمام تركي، لكن ليس مع الشاي

قهوة 

أنا ما بحب الشاي

ممكن ستيلا [بيرة]

...

والميه

ميه كثير 

ميه نظيفة

هذا كل شيء بحتاجه

الأثنين 1 كانون الثاني/ يناير 2024 (ظهراً) 

كل سنة وأنت سالمة – بتمنى هالسنة تكون أحسن 

والله تعبنا كثير

انشالله ما أتصاوب بجسمي 

اليوم كان عنا مغامرة صغيرة عن الايفاكيويشن (الإخلاء)

متنا مائة مرة على الطريق واحنا رايحين وجايين

...

لما ينقطع الاتصال [الانترنت] بنموت مائة مرة بكل الأحوال

بس هذا الشي مش بإيدي

بحاول أجيب انترنت بأي شكل

الثلاثاء 2 كانون الثاني/ يناير 2024 (مساء)

عندي نت (انترنت) لكنه ضعيف

...

أنا مبسوطة إنك اشتقت لي

شكله في تحول قاسي بالحرب هذه الليلة

...

أعنف بكثير

اليوم وصلت البلد، في أماكن ما عرفتها

دخت 

ما عرفت أوصل لمحل

كنت رايحة على الشغل

...

الشغل لسه ماشي

وفي شغل كثير 

بس أنا زهقت

عنا شلتر (مأوى) كبير

...

عنا أكثر من 120 عيلة 

كانوا أكثر

كان عنا شلترين فضيوا لما وصلت الدبابات الإسرائيلية

[الناس] شردت على رفح 

هلا عايشين في خيم بلاستيك بالشارع

وضع مرعب

مستحيل أوصفه

...

احنا كمان في رفح 

جنب البحر

متنا من البرد

...

تعبانة كثير والله

بحاول أفصل (أرتاح) بس المكان مليان ناس

في نت (انترنت) هنا

بدي أروح أنام

3 كانون الثاني/ يناير 2024

البيت [الذي لجأت إليه] عليه قذائف وقصف مباشر

المطبخ تقريباً راح

هذه هي المنطقة اللي قالوا لنا روحوا عليها

صباح الفل

أنا كنت على باب المعبر [رفح] اليوم الصبح

جوالي حول فودا فون 

هههه

4 كانون الثاني/ يناير 2024

صباح الخير

...

الليلة والصبح كانوا طواااال وثقال

...

قصف كثير 

كمان على دارنا [في خان يونس]

كثير في خراب ودمار

بس البيت لساته واقف

...

أكيد ممكن نعيد بناؤه وترميمه

المهم نرجع

...

ما في ولا شيء هنا – لا كهرباء ولا إنترنت ولا مي ... ولا أكل

...

بس يعني من أول يوم وصلت هون، بحاول أوجد حلول

في ميه، بس وسخة وقليلة 

لكن على الأقل في شوية مي (ماء)

والنت (الانترنت) ضعيف

وما في كهرباء

...

أخبار عن اللي بصير بالعالم؟ يادوب بنسمع أخبار الحارة

ما بنعرف إشي

...

بصراحة أنا مش فارقة الأخبار معي بالمرة 

بس بسأل عن بيتنا

لأنه لازم نرجع

... 

أنا هلا جنب البحر

البحر بعيد عشر دقائق مشي أو أقل 

نفسي آخذ الأولاد الصغار بس الطرادات والبوارج بكل مكان

...

راح أصورلك صورة 

اليوم 

عندي اجتماع 

...

✌️♥️ 👌 👍 🙏

صلي لنحصل على خيمة اليوم

من 4 حتى 19 كانون الثاني/يناير 

[لم تجب س. على أية رسالة، باستثناء إرسال الإشارة التالية يوم التاسع من كانون الثاني-يناير]

9 كانون الثاني/ يناير 2024

✌️

21 كانون الثاني/ يناير (صباحاً)

أنا هنا 

...

الإرسال بروح وبيجي – بجد ضعيف جداً

بس الواتس اب شغال

والله كنت مشغولة جداً 

عم نفتح شلترين جديدين (مكانين للإيواء)، بكل تفاصيلهم

وكان طالع لي دمل برجلي ورحت على الدكتور وشاله بدون بنج 

وبدون غرز

وبدون أي شيء

طلب مني أنام على الأرض وقال لي بدي أحط شوية بنج، وحط سبيرتو (كحول)

وبعدين اكتشفت إنه ما كان البنج متوفر 

...

أيودين وسبيرتو (كحول) 

وبعدين طلب مني أنام على الأرض وبدأ يشتغل 

متت

يعني الحرب كوم وهاي التجربة كوم ثاني

لكن شغل الدكتور كان رائع بصراحة

...

معجزة، عن جد

وكان العلاج تمارين رياضية طول اليوم

حتى يتأكد إنه الجرح نظف

وأعطاني حبة ترامادول

...

وكل يوم لازم أغير على الجرح

فظيع الدكتور 

أنا اليوم بخير

...

بنصف شغله صار يزغزغني، وأنا فكرته بتحرش

طلع جزء من التنظيف

أنا نطيت من محلي، هيك حكت أختي – كانت معي 

...

اللحظة اللي نطيت (قفزت) فيها طلع كل شيء وما ظل شيء بعدها

...

أختي بتسلم عليك. عم تعمل فطاير بسبانخ

21 كيلو كل مرة

لكن الدكتور كان ممتاز، بجد

...

ها !!! [أخبار عن توقف القصف]

بتمنى

بتمنى

كنت قبل شوي في منطقة قريبة من خان يونس. النار مولعة في كل مكان

...

آه، نعم أنا تركت خان يونس

أنا في المواصي برفح 

أنا نازحة 

ما حد لازم ينزح (يمزح) معي

ما بحب المزح (النزح)

نكتة بايخة

...

أنا زهقت

بدي أرجع للحياة

...

يا إلهي، آه، لأمضي ليلة على ضفاف النيل

...

سعر ليتر البنزين 170 شيكل

حوالي 1400 جنيه مصري

23.5 دولار 

24 كانون الثاني/ يناير (ليلاً)

ممكن تسألي عندك إذا كان بزبط تفعيل الشريحة من فودافون؟

ما عندي فكري على اسم مين تسجلت. لقيتها مع شخص. 

إذا غلبة انسي الموضوع

25 كانون الثاني/ يناير (صباحاً) 

صباح الخير 

براحتك مش مستعجلة

بدي أحاول أشبك نت (انترنت) من خلال هذه الشريحة – إذا زبط

...

هي شريحة عادية 

جوالي قديم وما بينفع أركب له أي سيم (شريحة)

بس بدي أجربها لأني مش بعيدة عن الحدود. 

...

معناها، بقدر أحاول من عندي بأني أطلب تفعيل الشريحة بالاتصال على 888؟

حسنا

انشالله

...

إذا بتقدري [تلاقي حد في فودافون من جوا بعرف كيف نتخطى الحواجز] بكون عظيم!

بكون أسهل إذا بتعرفي حد بشتغل في فودافون، طبعاً، ولما أرجع من الشغل راح أجربها.

28 كانون الثاني/ يناير (مساء)

أنا تعبانة ومرهقة وزهقت الحرب

كل العيلة مرضانين

وما في أي نوع دواء

على ما يبدو مشكلة بالأمعاء

🏀 🏀

بعد ساعة

واحد ورا الثاني، كلنا مرضنا

هلا صار سبعة منا مرضى 

الصبح كان بس واحد مريض

مش عارفة شو السبب

لكن بالتأكيد من الحرب

التفاصيل مش مهمة بجد

مريت على كل العيادات والصيدليات وما لقيت أي شيء

قالوا لي نغلي رز وناكله، لكن الرز أغلى شي

30 كانون الثاني/ يناير 2024 (صباحاً)

الكل تعبان كثير، سخونة وانفلونزا، وعدد المرض بيزيد

...

أنا باخذ مضاد حيوي ومسكن وبطلع على الشغل

...

أول ما يجهز المطبخ بالشلتر (المأوى) راح أظل بالدار 

عندي سخونة ووجع ومش قادرة أبلع زوري (آلام بالحلق)

لكني خايفة كثير على بنت أخوي الصغيرة 

حرارتها مرتفعة كثير

..

فش عنا ميه من 3 أيام

بس عملنا كمادات

... 

وما عنا خل، الخل خلص

...

المشكلة إنه شريط الدوا المضاد اللي حصلنا عليه بلف علينا كلنا وبيخلص

30 كانون الثاني/ يناير (مساء)

يا الله، يا مصر، 

أعطينا هدنة قبل ما ننهار أو نموت

ما ظل عنا طاقة ولا صحة

...

الله يلعن أبو النظام الدولي، شو كذاب

2 شباط/ فبراير (صباحاً)

الفنانة التي رسمتني استشهدت مع كل عيلتها

[أرفقت اللوحة]

…

كانوا محاصرين

...

أنا بكره كلمة مجزرة، لكن هذا اللي حصل 

مجزرة بدارهم

امبارح (يوم أمس)

...

4 شباط/ فبراير (صباحاً)

صباح الخير

شو السؤال؟

...

لو في وقف إطلاق نار، أول شيء بفكر فيه؟ دارنا

واقفة في محلها ولا مدمرة 

كيف بدي أدخل دارنا مع الصغار؟ وكيف بدي أوضح الدمار اللي موجود حالياً– إذا كان الدمار اللي بنعرفه وشفناه أو كان أكبر وصار أسوأ هلا

طول الليل بفكر بهالموضوع

صار عنا دمار كبير

بس صار لي شهر ما سمعت خبر إذا كانت الدار بعدها واقفة أو لا

...

بالنسبة لصحتي، حاسة كثير أفضل

...

المية والأكل كثير قليل، ما بتزيد، ما في شي تحسن

كل يوم بنقص شيء جديد

...

مثلاً كان في سكر، واليوم بطل في سكر أبداً

الطحين كان متوفر وهلا صار صعب الحصول على طحين

...

وملح ما في 

ودواء ما في 

شامبو ما في 

ما في إشي

الصيدلية بتبيع علب فول

5 شباط/ فبراير (صباحاً)

صباح الخير

البارحة روحت من الشغل ونمت على طول، مع إني جبت صديقة لتنام عنا وتغير جو من اللجوء اللي هي فيه

بس كنت مستوية

ونمنا الساعة 8:30 أو 9:00

...

كان في قصف طول الليل

كنت بنام وبصحى، بنام وبصحى

أصوات غريبة

حرقوا مركز من مراكزنا (المجتمعية)

بطلت أقدر أتحمل، انقهرت

بنيناه سنة 2019

كان جديد وكثير وحلو

...

راح أبعثلك صورة

...

راح تنجني [لما تشوفي صورة المركز]

...

اسمعي

في بن (قهوة) من مصر اسمه الطاحونة

...

كنت ناسية الطعم الزاكي للقهوة 

لا ما تسألي عنه عشاني

أنا بس بدي أخبرك إنه طعمه منيح بجد

لكن سعره غالي شوي عنا هنا

الكيلو 200 شيكل

...

أنا موضوع القهوة لاخمني 

ونسيت

خلينا نحسب، 1600 جنيه مصري كان تقريباً 50 دولار

بس أنا ناسية طعم القهوة الزاكية بفمي

هههههه

...

واو! 50 دولار اليوم بتساوي 3500 جنيه مصري؟!

...

على كل حال، نعم، جربيها وخبريني إذا حبيتها أو لا

...

أنا بفضل القهوة العربية السادة، بدون أي إضافات

...

بدي أعرف كم سعر الكيلو كان في مصر 

قبل 7 أكتوبر

بس لازم أنزل على الشغل هلا

6 شباط/ فبراير 2024

اجتني هدية اليوم

[صورة لكيس من قهوة الطاحونة المصرية]

7 شباط/ فبراير 2024 (صباحاً)

أنا مرشحة كثير

اندبحت من برد وريح البحر كل يوم

9 شباط/ فبراير 2024 (ظهراً)

القهوة التي وصلتني ممتازة مقارنة بالقهوة الموجودة هنا

على الأقل أكيد فيها كافيين مش حمص

...

لا تسألي كيف حالي

لأنه الجو حوالينا كله عدمي 

والكل متأثر فيه

...

الله يلعنهم 

أغبياء

أنا قاعدة هنا بتفرج على مدينتي تحترق أمامي- لايف

شيء بقهر 

س. كرست السنوات الـ ٣٥ الماضية من حياتها لدعم المبادرات المجتمعية التي تخلق مساحات آمنة وفرص للأطفال والشباب في غزة ليحتفوا بابداعاتهم ويحققوا أحلامهم، من أجل المساهمة في مجالات التعليم والثقافة المعاشة والصحة وجودة حياة أسرهم ومجتمعاتهم عبر الأجيال المتعاقبة. طلبت "س" عدم الكشف عن هويتها بسبب المخاوف المتزايدة في غزة من استهداف إسرائيل للأصوات التي تكشف ما يجري وتفضحه علناً، بالإضافة إلى المخاوف من استهداف عائلاتهم.